Тыа сиригэр сүөһү кыстыгын түбүгэ саҕаламмыта ый аҥаара буолан эрэр. Тыа хаһаайыстыбатын уонна ас-үөл бэлиитикэтин миниистирин солбуйааччы Николай Афанасьев улуустар тыа хаһаайыстыбатыгар салалталарын салайааччыларын кытта ВКС эрэсииминэн кыстык хаамыытын дьүүллэстэ.
Министиэристибэ былаанныырынан, идэһэҕэ туттубут кэннэ быйылгы кыстыкка 161 864 төбө хороҕор муостаах, ол иһигэр 69 658 ынах, хотоҥҥо хорҕойуохтаах. Улуустартан нэдиэлэ аайы хомуйуллар оперативнай иһитиннэриигэ сигэннэххэ, бу дьыл алтынньы 24 күнүнээҕи туругунан, 206 312 ынах сүөһү (о.и. ынаҕа – 71 213 төбө) баар. Министиэристибэ туһааннаах исписэлиистэрэ бүттүүн ахсаантан 44-45 тыһ. төбө кэриҥэ эккэ туттуллуоҕун сабаҕалыыллар.
Сылгы бүттүүн ахсаана, билигин баарынан – 244 568 төбө. Бу иһигэр быйылгы төрүөх 71 661 кулун (убаһа) баар. Эмиэ исписэлиистэр суоттуулларынан, идэһэҕэ убаһа ахсааныттан 48 тыһ. төбөтө туттуллуон сөп. Инньэ гынан, улаханныын-кыралыын барыта 181 796 сыспай сиэллээх кыстатыллыа диэн былаанныыллар.
Биллэрин курдук, ааспыт сайын маҥнай курааннаан, онтон ардаҕынан баппакка, оттооһун хампаанньата олус күчүмэҕэйдик бардар даҕаны, түмүк наһаа мөлтөҕө суох. Барыта 411,8 тыһ. туонна от (былааннаммыттан 95 бырыһыана) кэбиһиллибитэ. Мантан 37 тыһ. туоннатын мобильнай биригээдэлэр бэлэмнээтилэр. Өссө ааспыт кыстыктан, бэс ыйын 1 күнүнээҕи ааҕыынан, 15 285 туонна кур от ордубут эбит буоллаҕына, күн-дьыл туругунан идэһэлэнии хойутаан, бэлиэр, түгэҕин көрөн эрэр.
Оту тэҥэ сүөһү сүмэһиннээх аһылыгар 25 561 туонна сиилэс угуллан, былааннаммыт кээмэй 95 бырыһыана туолбута. Итиэннэ 12 798 туонна сенаж сууланан, былаан куоһарыллыбыта (103 бырыһыан).
Улуустарга оттооһуҥҥа тириэрдиллибит сорудахтаах былааны Мииринэй 123, Уус Алдан уонна Нам 105-тии, Эбээн Бытантай 104, Кэбээйи 102, Хаҥалас 101, Абый, Ньурба, Ленскэй 100-түү бырыһыан толорбуттара. Оттон курааннаабыт Алдан 41, уһун ардах моһуоктаабыт Муома 53, Өймөкөөн 61, Уус Маайа 71, Үөһээ Халыма 60 бырыһыаннаахтар.
Мунньахха кэпсэтииттэн иһиттэххэ, Алдан улууһун “Пятилетка сопхуос” уонна “Алданнаааҕы агробырамыысыланнай тэрилтэ” ХЭУо-лара 700 туонна оту тастан атыылаһан тиэйтэрэргэ сайаапкалаан олороллор, Уус Маайа 800, Өймөкөөн 600 туонналыы оту көрдүүллэр. Ол гынан баран, тиэйии-таһыы ороскуотун толуйуу үбэ үүнэр сылга эрэ көрүллэр кыахтааҕын миниистири солбуйааччы сэрэттэ.
Ол оннугар билигин бигэргэтиигэ сылдьар үпкэ мобильнайдар эрэ тиксэллэрин туһунан этилиннэ. Ороскуоттарын сорҕотун толуйтарар көмө үбү ыраах тиийэн оттообут отчуттар сылы аһарбакка ылыахтара. Санаттахха, Амма улууһугар 6 330, Чурапчыга 7 073, Хаҥаласка 4 415, Тааттаҕа 3 635, Бүлүүгэ 2 911, Үөһээ Бүлүүгэ 2 497, Мэҥэ Хаҥаласка 2 216, барыта 14 улууска уонна Дьокуускайга, 37 103 туонна от мобильнайдар күүстэринэн оттоммута.
Саба быраҕан көрдөххө, былааннаммыт сүөһү-сылгы кыстыгы туоруур аһылыга баар курдук эрээри, сайын иккис аҥаарыгар охсуллан кэбиһиллибит от ардахха баттанан, хаачыстыбата элбэх улууска мөлтөҕүн билинэн туран, хаһаайыстыбалар сүөһү-сылгы аһылыгар билиҥҥиттэн болҕомтолоохтук, боччумнаахтык сыһыаннаһаллара эрэйиллэр күнэ-дьыла үүммүтэ илэ.
Василий Никифоров.ulus.media
Хаартыска: Александра Лаврентьева ( «Олох суола» хаһыат)