Мин бүгүн кэпсиир киһим эмиэ 80-с хаарыгар үктэнэрэ аҕыйах күн хаалбыт, Пенсионердар спардакиадаларыгар дуобакка бастаабыт атаҕынан инбэлиит, Василий Иннокентьевич Барашков буолар.
Кини 1946 сыллаахха, тохсунньу 1 күнүгэр Өлүөхүмэ Токотугар төрөөбүт. Төрдүлэрэ Чурапчылар эбиттэр. Эһэтэ Бодойбоҕо көмүскэ сылдьан баран Өлүөхүмэҕэ кэлэн кэргэннэнэн олохсуйбут. Ньукулай, Лэгэнтэй, Сэмэн диэн уолаттары төрөппүттэр. Ийэтэ Хартаайаптар диэн элбэх оҕолоох ыал кыыһа эбит. Аҕалара Лэгэнтэйдиин икки уол уонна түөрт кыыс оҕоломмуттар. Баһылай үһүс оҕонон күн сирин көрбүт. Лэгэнтэй колхуос оҕуһун айааһыыр идэлээх туруу үлэһит эбит. Онтон биир күн оҕус айааһыы сылдьан оҕустан бырахтаран, хабаҕын оһоллообут, ол кэннэ өр буолбатах өлбүт.
Баһылай Токоҕо 8 кылаастаах оскуола интэринээккэ үөрэммит, онтон салгыы Целетинскэй куоракка автошколаны бүтэрбит, 2-с кылаастаах старший механик идэтин баһылаабыт. Онтон Грузияҕа үс сыл аэропортка сулууспалаабыт. Аармыйа кэннэ Дьокуускайга киномеханникка үөрэммит, икки-үс сыл Чакырга, Аммаҕа үлэлээбит. Ол сылдьан Эдьээн кыыһа Маргарита Николаевна Прокопьеваны кэргэн ылбыт. Маргарита Николаевна, агроном, товаровед үөрэхтээх эбит, Эдьээҥҥэ, Бээлгэчигэ атыыһыттаабыт. Онтон Василий Иннокентьевич, киносеть сабыллыар диэри киномеханниктаабыт, араас үлэҕэ үлэлээбит. Барашковтар уопсайа биэс оҕоломмуттар. Билигин бары кэриэтэ Уус Маайаҕа олороллор. Маргарита Николаевна соторутааҕыта күн сириттэн күрэммит.
Василий Иннокентьевич,билигин, өссө да тилик курдук сылдьыаҕын 2017 сыллаахха прицепка уот оттор маһы быраҕа сылдьан, ыксалга –тиэтэлгэ чуурка төттөрү тэйэн кэлэн түһэн эрэрин көрбөккө бүөрүн доргуттаран оһолломмут.Икки-хас ый буолан баран, балыыһаҕа көрдөрөн, бүөрэ үлэлээбэт буолбутун быһан бырахпыттар. Аны, быһыллыбыт сирин төттөрү тигэллэригэр туох эрэ тымырын хам тигэн, атааҕа сүүлэ испит.Баҕарбатар да, атаҕын быстарарыгар тиийбит. Онон инбэлиит буолбут.
Василий Иннокентьевич эдэр эрдэҕиттэн успуорка сыстаҕас эбит техникумҥа үөрэнэ сылдьан, “Трудовые резервы” успуорт обществотыгар сылдьыбыт. Ол общество 50 сылын туолбут өрөгөйдөөх тэрээһинигэр көхтөөх кыттааччы спортсмен буолан учууталын кытта тиийэн улахан мунньахха сылдьыбыттар. Аммаҕа сылдьан рабочком ыҥырыытынан волейболга дьарыктаммыт Амма хамаандатыгар киирэн куоракка волейболга 2-с миэстэ, теннискэ 3-с буолбуттар. Саха сирин норуоттарын 4-с Спартакиадатыгар Москва спортивнай институтугар үөрэнэн кэлбит Аркадий Алексеевы уонна эмиэ Москва спортивнай институтугар үөрэммит Егоров диэн киһини кытта легкай атлетикаҕа үҥүү быраҕыытыгар күрэхтэспит. Үҥүүлэрин төбөлөрө Аркадий Алексеевтыын кэккэлэһэ түһэннэр түөрт чааска диэри сынньалаҥ биллэрбиттэр. Ол кэмҥэ уопсайыгар тиийэн нухарыйан ылбыт. Уһуктубута түөрдэ буолуо сүүрбэччэ мүнүүтэ хаалбыт. Ойон туран күрэхтэһэр сиригэр сүүрбүт. Кыл мүччү баттаспыт. Уоскуйар бокуой биэрбэккэ күрэхтэһиини саҕалаабыттар. Онно Аркадийдаах бастаабыттар, онтон Баһылай миэтэрэ аҥаарынан хаалан үһүс миэстэни ылбыт. Ол күрэхтэһиигэ быһыылаах, аны үрдүгү ыстаныыга культпросветка үөрэнэр, хореограф, табахтыы турар иккилии киһини үрдүлэринэн көтүөкэлиир уолу кытта күрэстэһэн 1м 80 см үрдүгү ылан бастаабыт. Киһитэ ол үрдүгү ылбатах.
Василий Иннокентьевич чымадаан муҥунан Москваттан тиийэ грамоталардааҕа эбитэ үһү. Онтуга барыта Бээлгэчигэ уу кэлэн бөһүөлэги сотон барыытыгар дьиэлэрин кытта устубут.
Киинэ ситимин уонна үлэ бэтэрээнэ бүгүн “Сэрии оҕото” ааты ылыахпын биир хонугунан хойутаан төрөөбүппүн диэн күлэ-күлэ кэпсиир. Санаатын түһэрбэт, модун санаалаах сэргэх сирэйдээх-харахтаах кыдьаҕаһы киһи көрө кэрэхсиир. Аҕыйах хонуктааҕыта “Дьоҕур табыталлара” диэн доруобуйаларынан хаарчахтаах дьон тэрээһиннэригэр эмиэ көхтөөх кыттыыны ылан доруобуйатын көрдөрүнэн, дьон көрүн-нарын, көрөн улуус дьаһалтатын бэлэҕин тутан дьиэлээтэ.
Василий Иннокентьевич, оҕолорун тапталлаыгар уйдаран, дьон үтүө алгыһыгар бигэнэн, өссө да уһуннук чэгиэҥ-чэбдик сырыт, өссө да ситиһиилэргинэн үөрт, кэтэһиилээх үбүлүөйгүн сэргэхтик көрүс.
Евсей Лугинов