Саһархай күһүнү солбуйан
Кырыалаах кыһыммыт буолуута,
Хотугу Байҕалга сайҕанан
Алаа Муос оҕуспут таҕыста!
Дьүкээбил уотуттан саҕыллан
Дьэҥкэрэ оонньоото көхсүтэ,
Тумарык быыһыгар багдаллан
Сулустаах халлааны бүрүйдэ!
Кыах ылан инники дьулуста
Күнтэн күн кыдьыга улаатта,
Дьааҥы таас хайаҕа дабайда
Хаар ыһан, чысхааны таһаарда!
Лүҥкүйэ айаатыыр дуораана
Эҥсиллэн, дьулааннык тарҕанна,
Дьыбардаах оҕуспут тыыныттан
Тиит маспыт лабаата тоһунна!
Хара тыа кырыанан бүрүллэн
Тоҥ уутун буларга иһийдэ.
Кыһыҥҥы аргыардан күрэнэн
Көтө, кыыл барыта кирийдэ!
Ол эрэн, Сахабыт сиригэр
Тус Хоту, Соҕуруу да буоллун,
Олохтоох түөлбэбит иһигэр
Аал уоппут – абырыа куруутун!
Түүн ааһыа, саһарҕа кытарыа
Үлэһит дьиэ кэргэн уһуктан,
Күннээҕи үлэтин саҕалыа
Кылгас кэм түгэнин былдьаһан!
Былыргы быраман дьыллартан
Бу маннык дьаһанар буоламмыт,
Дьылбыт оҕуһа айаатаан
Дьыбардыыр кэмнэрин аастахпыт!
Ханнык да тумарык тымныыттан,
Хайдах да чуһуурар чысхаантан,
Киһиэхэ, аал уотун сылааһа
Быстыбат үйэтин салҕыаҕа.
Андрей Апросимов — Андо
Тымныы оҕуһа. Ааптар графическай уруһуйа.