Антон Моисеев Күп нэһилиэгин олохтоохторо Наталья Иннокентьевна уонна Иннокентий Николаевич Моисеевтар улахан уолларынан буолар. Кини кыра эрдэҕиттэн дьоннорун кытта араас үлэҕэ бииргэ үлэлээн, сылдьыһан, оскуола спортивнай күрэхтэригэр көхтөөхтүк кыттан, буһан-хатан баран, эрдэ идэ ылар баҕалаах буолан Дьокуускайдааҕы массыына суолун техникумугар үөрэнэ киирбитэ.
Сыл устата бэйэтин үтүө өттүнэн көрдөрөн, техникум олоҕор көхтөөхтүк кыттан, үөрэнэр салаатыгар староста буолар итэҕэли ылбыта. Ааспыт сылга үөрэх чааһыттан ураты автотехникум үөрэнээччилэрэ байыаннай сборга орто идэни ылар үөрэх кыһаларын ортолоругар, Мэҥэ-Хаҥалас Бэстээҕэр күрэхтэһэн республика үрдүнэн иккис миэстэ буолбуттара. Бу көрдөрүү техникум аата үрдүүрүгэр эмиэ төһүү буолбута. Техникумҥа сылын аайы туйгун, ситиһиилээх, кэскиллээх үөрэнээччилэр квотанан көрүллэр РФ Правительствотын квотатынан түөрт стипендия бэриллэр. Быйыл олортон биир стипендия үөрэтээччилэр быһаарыыларынан уонна РФ үөрэҕириитин министерствота бигэргэтиитинэн Антон Моисеевка ананна. Онон Антон РФ Правительствотын стипендиатынан буолла уонна сыл устата ый аайы көрүллүбүт үбү ылыаҕа. Антоҥҥа салгыы ситиһиилэри баҕарабыт.
Евсей Лугинов
Хаартыска: Алексей Жирков үллэстиитэ