Чурапчыга идэһэ сүөһүлэри маассабай астааһын саҕаланна

 

«Чурапчы» тыа хаһаайыстыбатын потребительскэй кооперативын этин-үүтүн бородууксуйата Уус–Маайа улууһун биир кэтэһиилээх айылҕаттан ыраас, араас көрүҥнээх бородууксуйатынан буолар. Сотору кэминэн эмиэ биһиги Саҥа Дьыллааҕы эрэ аһылыкпытын буолбакка, күннээҕи араас үөрүүлээх түгэммитигэр киэн тутта ыалдьыттарбытын, чугас дьоммутун куду анньан аһатар, күндүлүүр аспытынан хааччыйа кэлэн, бытархан тымныы быыһыгар, атыы-тутуу ытыахтара турдаҕа. Билигин туох-ханнык үлэ бара турарын журналист Сэмэн Жендринскэй ыстатыйатыттан булан ааҕыаҕыҥ.

 Улуус киинигэр турар буойунаҕа идэһэ сүөһүлэри маассабай астааһын бэҕэһээҥҥиттэн, алтынньы 28 күнүттэн, саҕаланна. Быйылгы дьыллаахха түөрт күн устата “Чурапчы” ТХПК үлэһиттэрэ утуйар ууларын умнан туран, биир да мүнүүтэ тохтообокко, сынньанар диэни билбэккэ үлэлиэхтэрэ. Кинилэр сыралаах үлэлэрин түмүгэр кыстыгы туоруур сыллааҕы эппит-аспыт тутулуктанар буоллаҕа, диэн «Саҥа олох» хаһыат суруйар.

Билигин буойунаҕа үлэ-хамнас үгэннээн турар кэмэ.  “Чурапчы” ТХПК бырабылыанньатын оҥорон таһаарар эргинэр отделениетын начаалынньыга Айталина Петровна Павлованы көрсөн үлэ хаамыытын билистибит. Онуоха кини маннык хоруйдаата:

— Түөрт күннээх үлэбит саҕаланна. Күн аайы биир массыына сүүрэр, үлэһит илии тиийбэт эрээри, барыта холбоон 40-тан тахса киһи үлэлии-хамныы сылдьар. Тутар сүөһүбүт ахсаана күн аайы хамсыы турар, бу күннэргэ барыта холбоон 236 төбөнү идэһэлиэхпит. Манна эрдэ дуогабардаспыт бааһынай хаһаайыстыбаларбытыттан сорохторо “сүөһүбүтүн салгыы итиэхпит этэ” диэннэр эт туттарартан аккаастаннылар. Ол эмиэ үчүгэй төрүөт. 2022 сыллаахха алта күн устата 718 төбөнү астаабыппыт, оттон былырыын 271 этэ. Нэһилиэктэртэн чааһынай дьоннор эмиэ сүөһүлэрин туттардылар, бырабылыанньа уурааҕынан 1 сортаах киилэ эти 620 солк диэн ылынныбыт, орто хаачыстыбалаах – 500 солкуобай уонна онтон алын хаачыстыбалааҕы 450 солкуобайга сыаналаатыбыт. Эти үчүгэйдик туттарбыт нэһилиэктэри ааттаталаатахха Хахыйах учаастагын үс бааһынай хаһаайыстыбата үчүгэйдик туттардылар, Мындаҕаайыттан, Хайахсыттан, Чакыртан, Хадаартан чааһынай дьоннор сүрдээҕин эбилиннилэр. Маҕаһыыннарга суордуттан көрөн буут эт, ойоҕоһун, холун сыаната араастаах буолар. Төһө кыалларынан нэһилиэнньэни этинэн хааччыйа сатыахпыт.  Халлааммыт хата туран биэрдэ, наһаа сылыйбата, аһара тымныйбата. Түгэнинэн туһанан, бырабылыанньа аатыттан күүстээх үлэҕэ сылдьар кэлэктииппитигэр дириҥ махталбын тиэрдэбит, кинилэр күүстэринэн үлэбит таһаарыылаах, кыайыылаах-хотуулаах.

 

Мантан салгыы быйылгы сылга улуустааҕы киин буойунаҕа ыытыллыбыт үлэ-хамнас түгэнин, тэрилтэ үлэһиттэрин хаартыскаҕа үйэтиппит түгэннэрбин эһиги дьүүлгүтүгэр таһаарабыт.

Сэмэн Жендринскэй. Ааптар хаартыскаҕа түһэриитэ. ulus.media