Саха тылын харыстыырга туһуламмыт «Тылы сөпкө туттуоҕуҥ» Улус.Медиа бырайыага саҥалыы тыыннаныа. Бу иннинэ икки сыл устата күн-дьыл, айылҕа көстүүлэриттэн саҕалаан, саҥа тиэрминнэргэ тиийэ быһаарыылаах ойуулар (иллюстрациялар) тахсыбыт буоллахтарына, билигин саха норуотун төрүт үгэстэрин, сиэрин-туомун сырдатар үлэ ыытыллыа.
2023 сыллаахха бырайыак «Төрөөбүт тыл – норуот баайа» өрөспүүбүлүкэтээҕи күрэххэ кыайан, салгыы сайдар кыахтаммыта.
Ол курдук, араас быһаарыылаах ойуулары таһынан, кэлэктиип үлэһиттэрэ хоту улуустарга тиийэн, ыраах сытар Арктика нэһилиэктэрин олохторун-дьаһахтарын сырдаппыттара.
Маны тэҥэ, Абый улууһугар Кэбэргэнэ, Сыаганнаах, Абый сэлиэнньэлэригэр тыа олоҕун уонна “Мэхээлэчээн булчут кэпсээннэрэ” кинигэ ааптардарыттан биирдэстэрэ Яков Стручков туһунан матырыйаал хомуйдулар. Бу айымньынан Саха сиригэр бастакы саҥарар кыыллардаах киинэ сэргэх бырайыага «Сахабэчээт» тэрилтэ көҕүлээһининэн, өйөбүлүнэн оҥоһулла сылдьар. Абый улууһун баһылыгын Владимир Новиковы кытта атах тэпсэн олорон кэпсэттилэр. Улуус тугунан дьарыктанан олорорун, бүгүҥҥү күҥҥэ туохха болҕомто уурулларын, инники сайдыыга былааннарын туһунан улуус баһылыгын интервьюта тахсыбыта.
Сыл бүтүүтэ Улус.Медиа телеграм-ханаалын сурутааччыларын ортотугар сүүйүүлээх оонньуу түмүгэр үс кыайыылаах «Тылы сөпкө туттуоҕуҥ» сахалыы халаандаары бэлэх тутта.
Улус.Медиа дойду духуобунай сыаннастары харыстыырга уонна бөҕөргөтөргө туһуламмыт үлэтигэр көхтөөхтүк кыттыһар. Онон быйыл «Сиэр-туом» (оробуочай аата) диэн саҥа бырайыак үлэтин саҕалыа. Бу чэрчитинэн саха норуотун төрүт үгэстэрин сырдатар быһаарыылаах ойуулар тахсан, ааҕааччыларбытыгар туһалыахтара диэн эрэнэбит!
Ulus.Media